ഫണ്ട് സമാഹരണം: വിദേശയാത്രയ്ക്ക് അനുമതി മുഖ്യമന്ത്രിക്ക് മാത്രം

തിരുവനന്തപുരം: പ്രളയ ദുരിതാശ്വാസ ഫണ്ട് സമാഹരണത്തിനായി വിദേശ രാജ്യങ്ങളിലേക്ക് കേരളാ മന്ത്രിമാർ നടത്താനിരുന്ന യാത്ര പ്രതിസന്ധിയിൽ. കേന്ദ്ര സർക്കാരിന്റെ നയതന്ത്രാനുമതിയും വിസയും ലഭിക്കാത്തതാണ് പ്രതിസന്ധിക്കിടയാക്കിയത്. പ്രളയാന്തര പ്രവർത്തനങ്ങൾക്ക് പ്രവാസികളിൽ നിന്ന് ഫണ്ട് സമാഹരിക്കാനാണ് മുഖ്യമന്ത്രിയും മന്ത്രിമാരും ഗൾഫ് രാജ്യങ്ങളിലേക്കടക്കം വിദേശ യാത്ര നിശ്ചയിച്ചിരുന്നത്. മുഖ്യമന്ത്രിക്ക് മാത്രം കർശന ഉപാധികളോടെ യാത്ര നടത്താൻ കേന്ദ്രം അനുമതി നൽകിയതായാണ് റിപ്പോർട്ട്. രണ്ടാഴ്ച മുമ്പാണ് കേരള സർക്കാർ കേന്ദ്രത്തിന് അപേക്ഷ സമർപ്പിച്ചത്. ബുധനാഴ്ചയ്ക്കകം അനുമതി ലഭിച്ചില്ലെങ്കിൽ മന്ത്രിമാരുടെ യാത്ര മുടങ്ങിയേക്കും. ഈ മാസം 17-ന് മുഖ്യമന്ത്രി യുഎഇയിൽ എത്തുമെന്നാണ് അറിയിച്ചിരിക്കുന്നത്. 18 മുതൽ 21 വരെയുള്ള ദിവസങ്ങളിൽ കേരളത്തിലെ 17 മന്ത്രിമാരും വിവിധ രാജ്യങ്ങൾ സന്ദർശിക്കുമെന്നും അറിയിച്ചിരുന്നു. മുഖ്യമന്ത്രിയുടെ സന്ദർശനത്തിൽ ഔദ്യോഗിക കൂടിക്കാഴ്ചകൾ പാടില്ലെന്നുംദുരിതാശ്വാസവുമായി ബന്ധപ്പെട്ട കൂടിക്കാഴ്ചകളെ പാടുള്ളൂവെന്നും കേന്ദ്രം നിർദേശംനൽകിയതായാണ് റിപ്പോർട്ട്. ലോകത്ത് ഏറ്റവുമധികം പ്രവാസി മലയാളികളുള്ള രാജ്യം എന്ന നിലയിലാണ് യു.എ.ഇ.യിലേക്ക് മുഖ്യമന്ത്രി തന്നെ എത്തുന്നത്. പ്രിൻസിപ്പൽ സെക്രട്ടറി ഇളങ്കോവൻ, മാധ്യമ ഉപദേഷ്ടാവ് ജോൺ ബ്രിട്ടാസ് ഉൾപ്പെടെയുള്ളവരും മുഖ്യമന്ത്രിയോടൊപ്പം എത്തുന്നുണ്ട്. മൂന്ന് എമിറേറ്റിലും മൂന്നുദിവസവും കാലത്ത് വ്യവസായ-വാണിജ്യ രംഗങ്ങളിലെ പ്രമുഖരുമായുള്ള കൂടിക്കാഴ്ച നിശ്ചയിച്ചിരുന്നു. വൈകീട്ട് പ്രവാസി മലയാളികളോട് മുഖ്യമന്ത്രി സംസാരിക്കും. 17-ന് അബുദാബിയിലെത്തുന്ന മുഖ്യമന്ത്രി പിണറായി വിജയൻ 18-ന് അവിടത്തെ പരിപാടികളിൽ സംസാരിക്കും. അന്ന് വൈകീട്ട് ഇന്ത്യാ സോഷ്യൽ സെന്ററിലാണ് മുഖ്യമന്ത്രിയുടെ പൊതുപരിപാടി. 19-ന് ദുബായിലായിരിക്കും പിണറായിയുടെ പരിപാടികൾ. വൈകീട്ട് അൽ നാസർ ലഷർ ലാൻഡിൽവെച്ച് മലയാളികളെ അഭിസംബോധന ചെയ്യുന്ന പരിപാടി സംഘടിപ്പിക്കാനാണ് ഇപ്പോഴത്തെ ആലോചന. ഇതുസംബന്ധിച്ച ആലോചനായോഗം വെള്ളിയാഴ്ച വൈകീട്ട് ദുബായിൽ നടന്നു. 20-ന് ഷാർജയിലും മുഖ്യമന്ത്രി പരിപാടികളിൽ സംബന്ധിക്കും. 21-ന് അദ്ദേഹം മടങ്ങുമെന്നാണ് ഇപ്പോഴത്തെ സൂചന. യു.എ.ഇ.യിൽ നോർക്ക വൈസ് ചെയർമാൻ എം.എ. യൂസഫലിയുടെ നേതൃത്വത്തിലാണ് ബിസിനസ് രംഗത്തെ പ്രമുഖരുമായുള്ള ആലോചനയോഗങ്ങൾ നടത്തുന്നത്. കേരളത്തിനായുള്ള സഹായം സ്വരൂപിക്കുന്നതിനൊപ്പം നവകേരള നിർമാണത്തിന് ആവശ്യമായ അഭിപ്രായങ്ങൾ തേടുന്നതും യാത്രയുടെ ലക്ഷ്യമാണ്. രാജ്യത്തുള്ള കേരള ലോകജനസഭാ അംഗങ്ങളും പരിപാടിയുടെ നടത്തിപ്പിനായി രംഗത്തുണ്ട്.

from mathrubhumi.latestnews.rssfeed https://ift.tt/2QPq0Nu
via IFTTT