ഒമിക്രോൺ സമൂഹവ്യാപന ഘട്ടത്തിൽ; നഗരങ്ങളിൽ ശക്തമായ സാന്നിധ്യം, പടരുന്നത് ബി.എ.- 2 ഉപവകഭേദം

ന്യൂഡൽഹി: കൊറോണ വൈറസിന്റെ ഒമിക്രോൺ വകഭേദം ഇന്ത്യയിൽ സമൂഹവ്യാപന ഘട്ടത്തിലാണെന്ന് ലബോറട്ടറികളുടെ കൺസോർഷ്യമായ ഇൻസാകോഗ്. മെട്രോ നഗരങ്ങളിലാണ് രോഗവ്യാപനം കൂടുതലെന്നും വൈറസിന് നിരന്തരം ജനിതകവ്യതിയാനമുണ്ടാകുന്നുണ്ടെന്നും ഇൻസാകോഗ് വാർത്താക്കുറിപ്പിൽ അറിയിച്ചു. ബി.എ.-1, ബി.എ.-2, ബി.എ.-3 എന്നിങ്ങനെ മൂന്ന് ഒമിക്രോൺ ഉപവകഭേദങ്ങളാണ് രാജ്യത്ത് റിപ്പോർട്ട് ചെയ്തിട്ടുള്ളത്. നിലവിൽ റിപ്പോർട്ട് ചെയ്യുന്ന അധികം കേസുകളും ബി.എ.-2 വകഭേദമാണ്. മിക്കവയും തീരെ രോഗലക്ഷണങ്ങൾ ഇല്ലാത്തതോ നേരിയ ലക്ഷണങ്ങളുള്ളതോ ആണ്. എന്നാൽ ആശുപത്രി പ്രവേശനവും ഐ.സി.യു. കേസുകളും വർധിച്ചിട്ടുണ്ട്.ബി.എ.-1 ഉപവകഭേദം സ്ഥിരീകരിച്ചവരെല്ലാം വിദേശയാത്ര കഴിഞ്ഞെത്തിയവരാണ്. ഡെൽറ്റയെ പിന്തള്ളി അതിവ്യാപനം നടത്തുകയാണ് ഈ വകഭേദം. വിദേശയാത്രാ ചരിത്രമില്ലാത്തവരിൽ ഇത് റിപ്പോർട്ട് ചെയ്തിട്ടില്ല. ബി.എ.-3 മഹാരാഷ്ട്ര, ഡൽഹി, പശ്ചിമബംഗാൾ എന്നിവിടങ്ങളിൽ ഏതാനും കേസുകളേ റിപ്പോർട്ട് ചെയ്തിട്ടുള്ളൂവെന്ന് ഇൻസാകോഗ് പറഞ്ഞു. 1,50,710 സാംപിളുകളുകളാണ് ജനിതകശ്രേണീകരണത്തിന് ഇൻസാകോഗ് വിധേയമാക്കിയത്. ഇതിൽ 1,27,697 സാംപിളുകളിൽ ഉപവകഭേദ പരീക്ഷണങ്ങൾ നടത്തി.

from mathrubhumi.latestnews.rssfeed https://ift.tt/33ZjRdm
via IFTTT