വൃദ്ധിമാന്‍ ദ സൂപ്പര്‍മാന്‍

കൊൽക്കത്ത: ടെസ്റ്റിൽ ഇന്ത്യയ്ക്കായി വിക്കറ്റിനു പിന്നിൽ മികച്ച പ്രകടനം പുറത്തെടുക്കാറുള്ള താരമാണ് വൃദ്ധിമാൻ സാഹ. ഇപ്പോഴിതാ ഇന്ത്യൻ മണ്ണിലെ ആദ്യ ഡേ-നൈറ്റ് ടെസ്റ്റിലും അതിന് മാറ്റമൊന്നും വന്നിട്ടില്ലെന്ന് സാഹ തെളിയിക്കുകയും ചെയ്തു. ഇഷാന്ത് ശർമയുടെ പന്തിൽ മഹ്മദുള്ളയെ പുറത്താക്കാൻ സാഹയെടുത്ത ക്യാച്ച് ഈഡൻ ഗാർഡൻസിനെ ആവേശത്തിലാഴ്ത്തി. മഹ്മദുള്ളയുടെ ബാറ്റിൽ തട്ടിയ പന്ത് ഒന്നാം സ്ലിപ്പിലേക്ക് പോകുകയായിരുന്നു, ഇത് ഒരു മുഴുനീളൻ ഡൈവിലൂടെ സാഹ കൈക്കലാക്കി. പിങ്ക് പന്തിന്റെ അസാമാന്യ സ്വിങ് കാരണം ഏറ്റവും കൂടുതൽ ബുദ്ധിമുട്ടിയതും സാഹ തന്നെ. ഇന്ത്യൻ പേസർമാരുടെ പന്തിന്റെ ഗതിയറിയാതെ ബംഗ്ലാ താരങ്ങൾ ബുദ്ധിമുട്ടിയപ്പോൾ വിക്കറ്റിനു പിന്നിൽ സാഹയ്ക്ക് നല്ല തിരക്കായിരുന്നു. ആദ്യ ദിനം രണ്ടു ക്യാച്ചുകളാണ് സാഹ സ്വന്തമാക്കിയത്. ഇതിനിടെ ടെസ്റ്റ് ക്രിക്കറ്റിൽ 100 പുറത്താക്കലുകളെന്ന നേട്ടവും സാഹ സ്വന്തമാക്കി. ഈ നേട്ടം സ്വന്തമാക്കുന്ന അഞ്ചാമത്തെ ഇന്ത്യൻ വിക്കറ്റ് കീപ്പറാണ് സാഹ. 37 ടെസ്റ്റുകളിൽ നിന്ന് 89 ക്യാച്ചുകളും 11 സ്റ്റമ്പിങ്ങുകളുമാണ് സാഹയുടെ അക്കൗണ്ടിലുള്ളത്. എം.എസ് ധോനി (294), സയ്യിദ് കിർമാനി (198), കിരൺ മോറെ (130), നയൻ മോംഗിയ (107) എന്നിവരാണ് സാഹക്ക് മുന്നിലുള്ളത്. Content Highlights:Wriddhiman Saha takes an exceptional catch

from mathrubhumi.latestnews.rssfeed https://ift.tt/2XFl3LD
via IFTTT