കെ എസ് യുവിന്റെ കോട്ടയായിരുന്ന തിരുവനന്തപുരം യൂണിവേഴ്സിറ്റി കോളജില് നിന്നും അവരെ വേരോടെ പിഴുതെറിഞ്ഞാണ് എസ് എഫ് ഐ അധികാരം ഉറപ്പിച്ചത്. വര്ഷങ്ങള്ക്ക് മുമ്പാണ് ഇത്തരം ഒരു നേട്ടം എസ് എഫ് ഐ കൈവരിച്ചത്. എസ്എഫ്ഐ പിന്തുണയോടെ 1974ല് മല്സരിച്ച് ചെയര്മാനായ ബാലചന്ദ്രമേനോന്റെ വാക്കുകളാണ് ഇപ്പോള് വൈറലായിരിക്കുന്നത്. ഇന്നലെയുണ്ടായ അക്രത്തോടെ വിവാദങ്ങളിലേക്ക് വീണ്ടും എസ്എഫ്ഐയും യൂണിവേഴ്സിറ്റി കോളജും നിറയുമ്പോള് വര്ഷങ്ങള്ക്ക് മുന്പുള്ള ഒരു സംഭവം ഓര്ത്തെടുക്കുകയാണ് ബാലചന്ദ്രമേനോന്.
'ഈ കോളേജിലെ രാഷ്ട്രീയത്തിന് ഒരു അപകടസൂചനയുണ്ട്. രാവിലെ കുളിച്ചു പരീക്ഷ എഴുതാന് ചെല്ലുന്ന ഒരു കോളേജ് യൂണിയന് ഭാരവാഹി കോളേജ് ഗേറ്റു കടക്കുമ്പോള് എതിരേല്ക്കുന്നതു ഓര്ക്കാപ്പുറത്തു കിട്ടുന്ന എതിരാളിയുടെ സൈക്കിള് ചെയിന് കൊണ്ടുള്ള ഇരുട്ടടി ആയിരിക്കും .അതിന്റെ കാരണം അറിയുന്നത് വൈകുന്നേരമായിരിക്കും .അതാവട്ടെ തലേ ദിവസം കാസര്ഗോഡ് കോളേജില് നടന്ന ഒരു കുടിപ്പകയുടെ പകരം വീട്ടലായിരിക്കും.' വര്ഷങ്ങള്ക്ക് മുന്പ് തന്നെ ഈ കലാലയത്തിലെ അവസ്ഥ ഇപ്പോഴും ചേര്ത്ത് വയ്ക്കാവുന്ന തരത്തില് അദ്ദേഹം ഫെയ്സ്ബുക്ക് കുറിപ്പിലൂടെ വ്യക്തമാക്കുന്നു.
'ഞാന് ചെയര്മാന് ആയിരിക്കെ നടന്ന ഒരു ചടങ്ങില് സഖാവ് ഇ .എം .എസ് ആയിരുന്നു മുഖ്യാതിഥി .ഒരു പക്ഷെ ഞാന് ജീവിതത്തില് ആദ്യമായും അവസാനമായും ഒരു വേദി അദ്ദേഹവുമായി പങ്കിട്ട ഒരേ ഒരു സന്ദര്ഭവും അതായിരിക്കണം. മീറ്റിംഗ് കഴിഞ്ഞു എല്ലാവരും പിരിഞ്ഞുകഴിഞ്ഞപ്പോള് ആവശ്യമില്ലാതെ ഒരു ക്രമാസമാധാന പ്രശ്നമുണ്ടായി . അത്യാവശ്യം കല്ലേറും ഉന്തും തല്ലും ഒക്കെ ചേര്ന്ന ഒരു മസാല . പുറത്തു നിന്നിരുന്ന പോലീസുകാര് കൂടി ആയപ്പോള് സംഗതി കുശാലായി . കോളേജിന്റെ ഒരു അടഞ്ഞ ബാല്ക്കണിയില് നിന്ന എന്നെ ലാക്കാക്കി ഒരു ഭീമാകാരന് പോലീസ് ചീറിപ്പാഞ്ഞു വരുന്നത് ഞാന് കണ്ടു . എന്നാല് എനിക്കെങ്ങോട്ടും ചാടിപ്പോകാനാവില്ല . ഭിത്തിയോട് ചേര്ന്ന് നില്ക്കാനേ കഴിയുള്ളൂ .അടി ഉറപ്പു തന്നെ . ചെയര്മാനായാലും അടി കൊണ്ടാല് നോവുമല്ലോ .ആ നിമിഷം എന്നിലും ഒരു ആവേശം നിറഞ്ഞു എന്നാലാവുന്ന തരത്തില് ഞാന് അലറി വിളിച്ചു. 'എന്നെ തൊട്ടു പോകരുത്...'
ആ ഗര്ജ്ജനത്തിനു മുന്നില് പോലീസുകാരന്റെ ലാത്തി അറിയാതെ താണത് എങ്ങിനെ എന്ന് എനിക്കും ഇന്നും വിശ്വാസം വരുന്നില്ല . പക്ഷെ കാക്കിക്കുള്ളിലെ ആ മനുഷ്യ സ്നേഹിയെ ഇപ്പോള് നന്ദിപൂര്വ്വം ഓര്ക്കാതെ വയ്യ .മരിച്ചു പോയ എന്റെ സഹപാഠി ലെനിന് രാജേന്ദ്രന് ആ സംഭവത്തെപ്പറ്റി തമാശയായി പറഞ്ഞു പരത്തിയത് എനിക്കോര്മ്മയുണ്ട്. 'യൂണിവേഴ്സിറ്റി കോളേജിലെ ചെയര്മാന് ആയിരുന്നിട്ടു പോലീസിന്റെ ഒരു തല്ലു പോലും കൊള്ളാതെ രക്ഷപെട്ട ഒരാള് ബാലചന്ദ്ര മേനോന് മാത്രമായിരിക്കും . ഞാന് ഇപ്പോഴും കരുതുന്നത് അടിക്കാന് വന്ന പൊലീസിന് വേണ്ടി ഒന്നുകില് മേനോന് ഒരുപാട്ടു പാടി കാണും ; അല്ലെങ്കില് ഒരു മിമിക്രി കാണിച്ചു കാണും . ആ ഗ്യാപ്പില് അടികൊള്ളാതെ രക്ഷപെട്ടുക്കാണും.' ബാലചന്ദ്രമേനോന് കുറിച്ചു.
from mangalam.com https://ift.tt/2laQEFT
via IFTTT
Hello, my name is shijas. Im a professional blogger
No comments:
Post a Comment