'പെണ്‍കുട്ടിയെ കാണാന്‍ ആണുങ്ങളെ പോലെ ഉണ്ട്, ഒരു പുരുഷനെയും ആകര്‍ഷിക്കാന്‍ അവള്‍ക്ക് കഴിയുമെന്ന് തോന്നുന്നില്ല'; ബലാത്സംഗ കേസില്‍ മനുഷ്യത്വവിരുദ്ധവുമായ വിധി പ്രഖ്യാപിച്ച് കോടതി

'ഈ ആരോപണം ഉന്നയിച്ച പെണ്‍കുട്ടിയെ കാണാന്‍ ആണുങ്ങളെ പോലെ ഉണ്ട്. ഒരു പുരുഷനെയും ആകര്‍ഷിക്കാന്‍ അവള്‍ക്ക് കഴിയുമെന്ന് തോന്നുന്നില്ല. പീഡിപ്പിച്ചു എന്ന് പറയുന്ന രണ്ട് യുവാക്കള്‍ക്കും ഈ പെണ്‍കുട്ടിയോട് യാതൊരു ആകര്‍ഷണവും തോന്നിയിട്ടില്ല എന്ന് അവര്‍ തന്നെ പറയുന്നുണ്ട്. അതിനാല്‍ തന്നെ ഇവര്‍ രണ്ടു പേരും കുറ്റക്കാരല്ല'', ഇത്തരത്തില്‍ വാദിച്ചുകൊണ്ട് കുറ്റാരോപിതരെ വെറുതെ വിടാന്‍ പറയുന്നത് ഒരിക്കലും കേട്ട് കേള്‍വി പോലുമില്ലാത്ത ഒന്നാണ്. എന്നാല്‍ അങ്ങനെ ഒരു സംഭവമുണ്ടായി. പ്രതികളുടെ സുഹൃത്തുക്കളോ ബന്ധുക്കളോ അഭിഭാഷകനോ പോലുമല്ല ഇക്കാര്യം പറഞ്ഞത്. ഇറ്റലിയിലെ അങ്കോണയിലെ ഒറു കോടതിയാണ് ബലാത്സംഗ കേസില്‍ ഇത്തരത്തില്‍ ഒരു വിധി എഴുതിയത്.

ഇത്തരം മനുഷ്യത്വ വിരുദ്ധമായ വിധി എഴുതിയ ബഞ്ചില്‍ വനിത ജഡ്ജിമാരും ഉണ്ടായിരുന്നു. 2015ലാണ് കേസിനാസ്പദമായ സംഭവം ഉണ്ടാകുന്നത്. രണ്ട് ചെറുപ്പക്കാര്‍ യുവതിക്ക് മയക്കുമരുന്ന് നല്‍കി ക്രൂരമായി ബലാത്സംഗം ചെയ്യുകയായിരുന്നു. എന്നാല്‍ ഇരയുടെ ഫോട്ടോ നോക്കി 'പെണ്‍കുട്ടി ആണുങ്ങളെ പോലെ ഇരിക്കുന്നു' എന്ന് പറഞ്ഞ് ബെഞ്ച് അവളുടെ ആരോപണത്തിന്റെ സത്യസന്ധതയെ തന്നെ സംശയിക്കുകയായിരുന്നു. ബലാത്സംഗം ചെയ്യപ്പെട്ടതിന്റെയും മയക്കു മരുന്ന് കുടിപ്പിച്ചതിന്റെയും പരിശോധന ഫലങ്ങള്‍ കോടതിക്ക് മുന്നിലുള്ളപ്പോഴായിരുന്നു ഇത്തരത്തില്‍ ഒരു നിരീക്ഷണം.

എന്നാല്‍ വിധിക്കെതിരെ നിരവധി പേര്‍ രംഗത്തെത്തി. ചുരുങ്ങിയ സമയം കൊണ്ട് 200 ഓളം പേര്‍ പ്രതിഷേധമറിയിച്ച് കോടതി വളപ്പില്‍ എത്തി. ''അത്രയും അസ്വസ്ഥതപ്പെടുത്തുന്ന ഒരു വിധി ആയിരുന്നു അത്. കേട്ട് നില്‍ക്കാനാവില്ല. പ്രതികളെ വിട്ടയക്കാന്‍ പല അസംബന്ധ കാരണങ്ങളും കോടതി കണ്ടെത്തുന്നുണ്ട്. ആരോപണം ഉന്നയിച്ച പെണ്‍കുട്ടി സുന്ദരിയല്ലാത്തതിനാല്‍ പ്രതികള്‍ക്ക് അവളെ ഇഷ്ടമല്ലായിരുന്നുവെന്നും അവളോട് അറപ്പായിരുന്നുവെന്നുമുള്ള കാരണമാണ് ഏറ്റവും ക്രൂരം'', സ്ത്രീകളുടെ അവകാശ സംരക്ഷണത്തിനായി പ്രവര്‍ത്തിക്കുന്ന അഭിഭാഷക സിന്‍സിയ മോളിനാരോ ദി ഗാര്‍ഡിയനോട് പറയുന്നു.

''ഈ വിധി നല്‍കുന്ന സന്ദേശം വളരെ ക്രൂരവും അപകടകരവുമാണ്. ഈ ചുരുങ്ങിയ സമയത്തിനുള്ളില്‍ അത് തിരിച്ചറിഞ്ഞ് പ്രതിഷേധിക്കാന്‍ ഇത്രയും ആളുകള്‍ ഇറങ്ങി തിരിച്ചല്ലോ എന്നതില്‍ മാത്രമാണ് ഏക പ്രതീക്ഷ'', സാമൂഹ്യ പ്രവര്‍ത്തകയും റിബല്‍ നെറ്റ്വര്‍ക്ക് എന്ന സ്ത്രീ സംഘടനയുടെ വക്താവുമായ ലൂസിയ റിസൈറ്റെല്ലി പറയുന്നു.

from mangalam.com https://ift.tt/2VQWJnZ
via IFTTT